კოლეჯი „სპექტრი“ 2013 წლიდან ჩართულია ინკლუზიური განათლების განხორციელებაში. სსსმ და შშმ პირებისათვის ხარისხიანი პროფესიული განათლების უზრუნველყოფისათვის კოლეჯში შეიქმნა ხელმისაწვდომი სასწავლო გარემო, რომელიც მოწყობილია უნივერსალური დიზაინის პრინციპით. დღემდე კოლეჯში ჩაირიცხა 300-ზე მეტი სსსმ და შშმ პირი, მათ შორის ტოტალური უსინათლო, სმენადაქვეითებული, ეტლით მოსარგებლე, აუტისტური სპექტრის, დაუნის სინდრომის, მენტალური და სხვადასხვა ინტელექტუალური დარღვევის მქონე სტუდენტები.
კოლეჯში არის „უნივერსალური დიზაინი“, რომელიც გულისხმობს ნებისმიერი საჭიროების და შესაძლებობების მქონე სტუდენტზე მორგებულ ფიზიკურ გარემოს. კერძოდ: პანდუსი, ლიფტი, აბრა (ყველა სართულის და კლას-კაბინეტის შესასვლელთან) – ბრაილის შრიფტი, კედელზე საყდენი, კიბის პირველი და ბოლო საფეხურის მონიშვნა, დერეფანში და ფოიეში ბილიკები უსინათლო და მცირედმხედველი ადამიანებისთვის.
სასწავლო პროცესში, სსსმ/შშმ სტუდენტებს, აქვთ მხარდაჭერა ადამიანური და მატერიალური რესურსების, ასევე სასწავლო პროგრამების ადაპტირების გზით. მათი პროფესიული განათლების ხელშეწყობის პროცესში ჩართულია ინკლუზიური პროფესიული განათლების ორი სპეციალისტი, სასწავლო პროცესის ასისტენტი.
აღსანიშნია ის ფაქტი, სტუდენტების ჩარიცხვის მაჩვენებლი მოიცავს სამშენებლო მიმართულების ფართო სპექტრს.
სსსმ/შშმ აპლიკანტების პროფესიულ პროგრამებზე ჩასარიცხად გვაქვს განსხვავებული მიღების პროცედურა. რეგისტრაციამდე/რეგისტრაციის პროცესში აპლიკანტს ვაცნობთ პროფესიებს, ადგილზე/სახელოსნოებში ნახულობს კონკრეტულ საქმიანობას. შეფასების შემდეგ ვახორციელებთ პრაქტიკული მოსინჯვის პროცედურას, სადაც აპლიკანტი თავად მოსინჯავს არჩეული პროფესიებისთვის მნიშვნელოვან აქტივობას მასწავლებელთან ერთად, თვითონ იღებს ინფორმირებულ გადაწყვეტილებას, თუ რომელ პროფესიაზე განაგრძოს სწავლა.
პროფესიული საგანმანათლებლო პროგრამების სწავლების პროცესში ყურადღებას ვამახვილებთ იმ წინაპროფესიულ უნარ-ჩვევებზე, რომელთა გამომუშავებაც მნიშვნელოვანია დასაქმებისა და შემდგომი დამოუკიდებელი ცხოვრებისთვის. აღნიშნულ უნარ-ჩვევებს ფუნქციურ მიზნებად ვაყალიბებთ: დროის მართვა; სივრცის მართვა; ინსტრუქციების შესრულება/მიყოლა; პირად ჰიგიენასა და შეასხედაობაზე(გარეგნობაზე/ჩაცმულობაზე) ზრუნვა; ეფექტური კომუნიკაცია; სოციალური უნარ-ჩვევები; ამოცანის დასრულებაზე ორიენტირებულობა; საქმის კეთებისას მოტივაციის შენარჩუნება; თავდაჯერებულობა; უსაფრთხოების დაცვა; სხვებთან თანამშრომლობის უნარ-ჩვევა; პრობლემების მოგვარების უნარი; ტრანსპორტით სარგებლობა; შესასრულებელ საქმეზე პასუხისმგებლობა.
კოლეჯში სსსმ/შშმ სტუდენტებისთვის ხელმისაწვდომია სხვადასხვა სერვისი:
- გადაადგილების მხარდამჭერი (ტრანსპორტი),
- სივრცითი ორიენტაციისა და მობილობის ტრენერი,
- ჟესტური ენის თარჯიმანი,
- სტუდენტს, რომელსაც სჭირდება მუდმივი მხარდაჭერა და მეთვალყურეობა ლექციებისა და შესვენებების პროცესში საჭიროების შემთხვევაში ენიშნება სპეციალური ასისტენტი.
- უსინათლო და მცირედმხედველი სტუდენტებს შესაძლებლობა აქვთ ისარგებლონ ხმოვანი პროგრამით “NVDA” და პორტაბელური ვიდეო გამადიდებლით.
სსსმ/შშმ სტუდენტებისთვის, პროგრამული ადაპტირების კუთხით ხდება აკომოდაციის და მოდიფიკაციის აქტივობების განსაზღვრა.
საჭიროების შემთხვევაში, სპეციალური საგანმანათლებლო საჭიროების მქონე პროფესიული სტუდენტისთვის/მსმენელისთვის საგანმანათლებლო დაწესებულების მიერ მუშავდება ინდივიდუალური სასწავლო გეგმა, რომელიც ეფუძნება პროფესიულ საგანმანათლებლო პროგრამას/მოდულს და წარმოადგენს მის აკომოდაციას (სწავლებისა და შეფასების მიდგომებში ცვლილებას მისაღწევი სწავლის შედეგების ცვლილების გარეშე; აკომოდაციისას ვცვლით: სახელოსნოების, აუდიტორიების ფიზიკური გარემოს, საათების განაწილება და დღის გრაფიკი, სასწავლო მასალის ფორმის ან მოცულობის ცვლილება, სწავლების სტრატეგიებისა და სწავლების მეთოდების გამრავალფეროვნება (ინსტრუქციის,შეფასების აკომოდაცია) და /ან მოდიფიკაციას (მისაღწევი სწავლის შედეგების თვისობრივ ან რაოდენობრივ ცვლილებას; მოდიფიკაციის დროს ვახორციელებთ სწავლის შედეგების შესრულბის კრიტერიუმებისა და კომპეტენციის პარამეტრების რაოდენობრივ ან თვისებრივ ცვლილებას. მოდიფიკაციის დროს დგება ინდივიდუალური სასწავლო გეგმა (ისგ).
ინდივიდუალური სასწავლო გეგმა გამოიყენება, როგორც სახელმძღვანელო სპეციალური საგანმანათლებლო საჭიროების მქონე პროფესიული სტუდენტის/მსმენელის საგანმანათლებლო პროცესის განხორციელებისთვის. ინდივიდუალური სასწავლო გეგმის ფარგლებში სპეციალური საგანმანათლებლო საჭიროების მქონე პროფესიული სტუდენტის/მსმენელის მიმდინარე შეფასება ხორციელდება ინდივიდუალურად, განსაზღვრულ მისაღწევ სწავლის შედეგებთან, ხოლო საბოლოო შეფასება და კრედიტების მინიჭება – საგანმანათლებლო პროგრამის/მოდულის მოთხოვნებთან მიმართებით.”
2023 წელს კოლეჯს „სპექტრი“გადაეცა საქართველოს პარლამენტის სპეციალური ჯილდო, ინკლუზიური პროფესიული განათლების ხელშეწყობისთვის.